Barba Andrijica Zonetov mi je provjol obo temu kal su bili ostali bez vode na Brusnik. Ucinil je bil tarmuntanez, a oni su ostali bez vode. I ca ih je tukalo? Tukalo ih je tende mećat po skoju, rastirot tende i lizat tende ol rose, ali ca će kal je rosa bila slona, dobota kako more, jerbo tako je priko Brusnika slopilo, da je slop padol is rosun. Tako je i rosa bila slona. A lizali su i lisće ol smokve. Bila je sva bonda pocet ol Jezera pok sva bonda ol siroka do garbina- to je bila sve jelna smokva. Tu je bila divjo smokva i tu je reslo po tlehu. Izboga vitrih i slopa ni mogla rest u ariju, nego po tlehu. Tu se je bilo pogrebenicilo. I judi bi u takin teskin momentima kal je bilo pitonje hoće ostat zivi, lizali rosu na lisću ote smokve. Ta smokva je zapacovala blizu dvi motike i sve po tlehu, divjo smokovina po tlehu. Pok su tu lisće lizali. Pok su pekli jastoge i ćućoli, ali zeja se ni mogla zagosit. Ni bilo moguće porinut brud pok punć na Svetac za duć do vode. Osan-devet don su bili bez vode. I, srića, jelnu nuć ucinila veliko nevera i onda na te tende iskupili dvo baraila vode i tako su se isposili. Ol tad su ribori uvik nosili po jedon karatilac ol tolitra-dvo za dorzat vodu.

I sal ti veliki lavur i te ruke rastecene ... i ca se je dogodjalo: posli vecere olma bis bil pistulu otvoril pri nego bis isal leć jer ujutro tima parstima nisi bil sposoban olbotunat pistulu. Tu danas ne mores provjat mlodima, oni tu ne viruju, oni misle da ti lazes, a tu je tako bilo, jer tu ne provje oni koji ni provol, nego pni koji je provol, koji je plakol ca su ruke prasćile kal bi bil ujutro ćapol za arganel. I pok ujutro oni topli amonijak bil bi ti ruke omekcol i mogal si is njima lavurat. I kal bis ih bil natopil pisotun bil bis ih istresal kako pop kal blagoslivjo more. Oto vidis kaki je tu bil zivot. Ni bilo glicerina, ni bilo nelne masti, ni kreme za ruke nego oto ca je bilo. Tu je bila nojbojo krema. Pisota! Kal bi dusal krisnjok pena bi ti tal oni bili zuji iz ruk isli ća. Ol tih konopih bile bi ti ruke kako tovaru kopita. A osobito bis na Jabuku dobil te zuje, jer na Jabuku lavuros po cili don - ol zvizd do zvizd. Kal bis bil privecer dusal pol kroj ćutil si se raspadjen kako stori karatil bez obrucih.

Ma zamisli Cuf - somo bi mu se vorh bilo gori vidilo. Cuf na Brusnik tu je nojvisji brig, namo ol ostra. Cul son ol Dubrinih da bi somo jedon metar Cufa bil ostol povar kulpa. Kulap mora gre do vorha, onega vorha ol ostra, a un je visok dvonaste do petnaste metrih. bota bi se bila dvigla, ona bi ga bila zaokruzila. Brusnik je bil kako jedon brud kal su bili provi fortunoli. Svi je bil u slop. Bil bis stol pol tendu u navucenu gajetu i nisi mogal izoć vonka ol slopa. Sve je dimilo. Na zolo je bilo drugacije jer je bokun prihićalo priko briga, ali slopu nisi mogal uteć ninder, skuj je bil stalno pol slopon. Nisi imol di puć kal su bili fortunoli nego pol tendu u brud, a priko tende je vajalo ćapovat destre da je sigura ol vitra, da je vitar ne olnese. Pok se nisi mogal oprat. Pok su te oci uvik prasćile. Kalebi nisu mogli toti zivit. Bili bi zimi omakli pul Sveca, a ostali bi somo ribori i gusćerice. Na Brusnik si uvik moral stot atento da ti u pijat gusćerica ne ide. Na Brusnik je puno onih cornih gusćeric. Imo ih i sa dvo repa. I tako je ti zivot kuril iz godisćo u godisće. Pomalo se je starilo u lavuru i provjonju.

Bili bi stori ribori stoli prema suncu i pleli mrize, polplićoli i provjali. Provjali koko je ovi ujol, koko je oni ujol, koko je furtunih provol, koko je mriz zakarpil, koko je rop nacinil, koko je putih bil mokar, kako ga vorte lopatice, kako ga kolina bole, kako se je iskrivil, kako su mu se ruke izgarcile ca je uvik plel. A bila bi mu vista oslabila pri vrimena ol soli. Oli se je tu umivalo. Ku će dat vode po skojima! Ni bilo vode. Kapja vode se je cuvala kako sunce, kako relikvija.
Tako su ti zivoti pasovali, ali isto bili su veseli zivoti. Veće je bilo prijatejstvo, kofidence, krejoncije meju judima. Nisu judi bili indiferentni jedon prema drugemu.

Bilo je, kako ću ti reć, Josko, bilo je nikega drugacijega nocina.

Autor: Joško Božanić

‍