I sal kal si se vrotil iz Kavaline na Brusnik, kal si dusal na kroj, sal ca vajo ucinit? Dusal si mokar umuran. Nojpri vajalo se je navuć. Noko bi se bilo navuklo jedon bi iskocil u Ospidol. Gori na brig ol Brusnika bila je jelna spila koja se zove Ospidol. Kal bi dazjilo, posli dazja veće je u nju mocilo nego dokle je doz padol. Vonka ćoro a u Ospidol dazji. I u tu spilu se je kuholo. Drug koji je bil zaduzen za kuhonje bil bi permomenta ocistil ribu i vazel ribu uzbardo. U Ospidol se je kuhol fazul pok bi un bil donalil vodu i potakal ogonj. A digod bi nosal izvornjenu lopizu ako bi izgoril nogur. Dogodjalo se je i tega da bi izgoril nogur ili nogorice. Onda je tukalo somega brujeta jist. Ali kal je bilo sve dobro, fazul bi bil kuhon i onda bi za cas iskuhol brujet.

Nasri skoja Brusnika tu je jezero pri bilo, a tu jezero su ribori zimski prigrodili i ucinili su toti sest-sedan jastozerih. Tako da je svako ort imala svoju jastozeru. I toti bi pok butali ta jastoge u svoju jastozeru. Na Brusnik je ribolo po pet-sest ortih tako da je bilo dovoljno jastozerih. A do potribe moglo se je ucinit jos koju jastozeru tako da se napravi jama pok da u nju dujde more. Tu je povezono sa moren. Toti je cirkulacija mora nasri skoja. Tu se i zove Jezero.

Kal bi se u jastozeru iskupilo kvintol-dvo jastoguv, i ako bi bilo lipu vrime, bil bi jedon brud tu olnil pul Komize. Jastoge je vajalo inpakat. Pri su bile kofe ol prućo. Za muga pametora deperalo se je kasune u koje je moglo stat ol trideset do pedeset kilih. Mećolo se do cetiri file jastoguv jelna povar druge, da se puno ne optereti one ol parve file. Vajalo je jastoga donit zivega Mestra Vicetu ili Bajamontu ili Cambarlinovima ili drugima koji su kupovoli jastoge. Na cetiri mista su kupovoli jastoge u Komizu. Opet da se vrotimo u Ospidol. Kal je ovi drug tu iskuhol, a ovi su drugi uredili jastoge, a svićor is jelnin drugon uredil brud i nacinil sakete ol vorsih za kontere koje su uvik kidole marine, onda bi ovi ol gore iz briga bil zavikal: "Ala, nasi, gotovo je, moća obidvot". Druzina bi se pok iskupila u Ospidol. Svak je imol katridu ol stine. Stul je bil jelna storo bukapurta koju je more hitilo na Zolo. Kal je bilo lipu vrime, bilo je lipega sunca i lipega mira, a kal je bilo slabu vrime, vajalo je puć pol tendu u gajetu. Pol tendu u gajetu kal bi se bilo obidvolo, vajalo se je ćapat vorsih. Vajalo je plest jer puno se vorsih gubilo. Bilo bi se plelo vorse i cinilo vorse. Koji nisu znali plest vorse, cinili su vorsnjoke. Uvik je bilo lavura za svakoga.

Onda bi se uzalo zaigrat. Deperalo se je korte pok bi se zaigralo na korte. Većinun se je za cukar igralo. Cukar je bil u kvadrote kuse, onda se je igralo partidu za dvo kusa cukara. Jerbo svaki drug je nosil cukar za sebe. Tu ni bilo u zajednicu. Vino, cukar, rakiju, smokve tu je svak zo se nosil. Za pineze se ni igralo. A kal je bilo sunce, kal ni padol doz, a furtuna, onda bi se igralo na balote. Nasri skoja bilo je igralisće, bili su zugi, bila su dvo zuga ucinjena. Toti je bokun ravnice pok su bili zagrodili stinjima i ucinili za igrat na balote, a balote su bile okrugle stine ol Brusnika.

Nojgore je bilo kal su bili furtunoli kal si gledol iza kolnjika ol igralisćo kako puse tarmuntanez ili kal su veliki sirokoli, kako kulpi mora gredu priko Cufa i kako se more iz jelne bonde ol juga spojo sa moren ca rebaton dohodi iz Sveca pok bi se tako skuj podilil na dvo skoja. More ol juga holo je sve do briga ol Zola, a opet furtuna ol rebata iz Sveca prilivala je Zolo. Zatu je te brode vajalo stavit visoko niz bondu, na bondu ol Kagarele da ih more ne olnese. Mećolo se je brode gore olma sezdeset-sedandeset metrih daleko ol mora. Ali bili su dobri parongi i poluge, bilo je loja i judi su bili pratiki za te brode potezat.

Svi provi zimski ribori nikal nisu zelili po skojima nista ugrodit veće nego njin je bila nuzno potriba, a nisu cinili ni ono ca njin je bilo potriba zatu da drugi ne gredu ribot na te skoje. Jer kal bi ugrodili bunjac za spat, kućicu za sponje ili gustirnu za vodu, onda ne bi bili somo oni holi na skoju, holi bi i drugi. Pri se na Svecu uvik spolo u spilu Mancinovicu i uvik se je govorilo da će Mancinovica past, a nikur ni til ugrodit bunjac. A zoc ni til - jer ako un ugrodi bunjac koristit će ga i drugi koji ne bi dusal toti ribot ako ga tuko spat u spilu. Glovni razlog ca se po tima skojima nista ni ugrodilo bil je da bude manje ortih na skoju, da si slobodan za lavurat i da mores veće ujot.

Brusnik je bil cudo bogat za jastoge. Un kolo sebe imo veliki prostor. Kolo njega je sa svih bondih, a osobito sa bonde od levonta, ol tarmuntone pok sve do garbina veliki je teren di se je ribolo jastoge. Onda je toti i Kavalina di se je puno jastoguv lovilo. Zatu je i dobila ime Kavalina - uvik se je na nju kavalo, uvik se je vadilo jastoge.

Autor: Joško Božanić

‍