Kal su velike zimske furtune, veliku more prisice Brusnik - pritvori ga u dvo skoja. Priko sride, tu se zove Dolac, di su jastozere, toti prodre more ii podili Brusnik na dvo dila.

Na temu molemu pustemu skojiću nasri mora provel son puno zimskih misecih. Sve je bilo dobro dokle je bilo lipu vrime, dokle se je lovilo jastoge, ali kal bi ucinilo slabu vrime po pet-sest don, po sedan-osan don. Digod i deset don znalo je ucinit slabu vrime. Onda si bil kako jedon utopjenik. Okolo tebe somo je bil slop ol mora. Cili skuj je bil u slopu i somo si cul - ca si cul - cul si jedon tutanj, onu huku mora. Nisi nikal ćutil da si na kraju, na siguro, nego kako da si u brodu. Uvik je stroh bil u tebi isto kuda da si u brodu. I ta samoća, ti stroh, ta izulacija, zivot u spilu, ti huk mora...Propju si pol noge ćutil kulpe mora, onu huku.

Tako je ti stroh bil u kostima. I is tin strohon je kogod ol riborih zivil i na temu pustemu skoju nasri mora u noćima kal se je cili skuj tresal ol kulpih mora i kal su bote i vitri urlikali kako sve hudobe ovega i onega svita.

Brusnik je kako jedon veći brud surgon nasri kulfa. I kal ti zamislis kako je tu bila mladust di su ti judi zivili. Svićori su bili stariji, a druzina su bili mlaji judi po dvodeset, dvostipet godić nojcesće, a priko cetardeset godisć rilko. Kal bi covik pasol cetardeset godisć vej ni bil toliko sposoban za veslo. Vajalo je imat furce.

Bilo je razbijenih parstih i zujih na guzicu kal bi se bilo nose potezalo, kal bi se bilo vozilo al banko. Po cili don mokre guzice i vozit nose na provu. I ono trenje obo bastun - tu bi bilo napravilo zuje na guzicu. A da ne govorin kake su ruke bile. Kal se je ribolo na Brusnik i na Svecu, brodi su holi cesće u Komizu, ali na Palagruzu ostavolo se je i po dvo miseca a da covik ne bi dusal u Komizu. Digod i tri miseca. Bilo je judih koji cilu stajun nisu dohodili doma. Sal na Palagruzu i na Svecu bilo je boje. Tamo je vode pok bi se ribor, kal bi bilo slabu vrime, bil oprol, bil bi na Palagruzu isal na Salamandriju, bil bi vazel sporku robu i bil bi se oprol i obril. Ali na Brusnik tu ni bilo moguće. Voda je bila svetinja. Kal bi te vidil svićor da si oprol oci, bil bi te sovol: "Ca mislis, ako nos ćapo slabu vrime na Brusnik, zmul vode moze sposit zivot.

I kalebi zimi bili bi napustili Brusnik. Somo bi bile ostale corne gusćerice i judi. Ako si isal jist, tukalo je atento stot da ti gusćerica ne ide u pijat.
Po lnevu, kal bi se bilo dvizolo vorse, većinun su bili svićori u purtelu na karmu. Svićor bi bil komandol da se dobro naveze na kurent da ne bi mazor zadil i ostale vorse. Njega je nojveće bolilo ako vorsa ostane na lno, ako se je ne more iskapulat. I onda kal bi bile bonace pok kal bi se bilo zug suspendilo ol lna pustilo bi se brud aperoćo i svak bi pomogal dvizot. U Komizu je bila jastozera Mestrazaneta koja je mogla primit zimi ol osandeset kvintolih do vaguna jastogih. Tu kal bi bil dusal uskars ili Bozić , onda bi se tu kupovolo. Tu je holo u Pariz, Rim, Milano, Bec, Trest. A ku je pri znol u Jugoslaviju za jastoga. Jo se ispominjen kal je pokojan mestar Vice Marinković udij slol vonka po dvodeset kvintolih jastogih. A Komiza je jila jaglice i gire. Tu je bila nojjeftinijo riba i tu je jil puk.

Bojo riba hola je za Trest. Taljonski brud je hodil dvo puta na setemonu iz Tresta za Komizu. Iz Tresta je hodil na Riku, iz Rike u Zadar, pok Sibenik, Split, Komiza, Korcula, Dubrovnik, pok Kotor pok u Brindizi u Itoliju i tako ritorno sve naokolo.

U Komizu je bila centrala ol struje i ona je cinila led, a to je centrala napravjena trideset i druge. Pri tega nosilo se je led iz Splita. Bil je brud "Brioni" i no nje se je karcalo murluce, razine i jastoge. Na tonulode murluc i razin holo je za Trest. Sva dobro riba za vrime Austrije - sve je holo za Trest. Po parvemu ratu malo je Komiza kontaktirala sa Spliton. Pul Tresta se slala i riba i vino i rakija. U Trestu su bili i u Pulu komiski targuvci koji su prodovali. Osin te veze imali smo poluteretnu prugu Susak - Kotor svaku setemoni i ovu lokalnu prugu svaki don za Split.

Stori komiski ribori tu su bili nojinteligentniji i nojodvazniji judi u Komizu. Oni su imali misto meju gospodun. Pri kal bi se reklo "dobro jutro, svićoru", tu je bil izraz krejoncije. Oni nojboji svićori nazivali su se kaparjuni. Kaparjun je moral puno znat. Tukol je znat napravit sve vorsti mriz, tukol je znat ormot svaku mrizu, zakarpit, konzervirat mrizu, vajol je poznavot kurente, vrime, vajol je poznavot lno, sve zodive i milure. Tukalo je znat odorzat ulovjenu ribu, sacuvat jastoge, tukalo je poznavot navigaciju, znat jidrit, poznavot astronomiju. Tu je bilo toliko znonjo da nonke jedon likor ni bil opterećen is tolikin brojen raznih podatkih kako jedon svićor.

Jer ti judi, kal obo temu razgovoromo, oni nisu istaknuti. Njih nikur ne priznaje, nikur ne respeto. Ali njima tuko priznat. Oni kal bi bili dusli u trideset i pet, cetardeset godisć bili bi zabilili ol velikih pensirih i ol stalne napetosti is kojun su zivili. A znos, nevera danas, nevera sutra, jidrit, iskidot jidro, past ispol skoja, furtunun ne moć ćapat kroj i tako daje. A pok mi smo na otvorenemu moru. Ninder nisi mogal puć pri neverun da si stu na stu sigur. U porat si bil, a nisi bil sigur. Jedino ti je bilo siguro ako si se potegal na dvi poluge. Tad si pren mogal zaspat kako covik. Nasi stori svićori su mećali pol glovu stinu ol surgovonjo da se ne opusti, da ne zaspi tvordo ol truda, da uvik bude na pul budan.

Komiza je tad lovila na vagune jastogih. Komisko jastozera bila je puna uvik. Tu se je slalo za Pariz, za Trest, za Bec. Usuda su se ti jastozi iskali. Mestar Vice, koji je imol jastozeru, slol je udij po trideset kvintolih jastogih u jelnu ekspediciju. Za Bozić i za Uskars islo bi iz Komize po vagun jastogih.

Na tima molima skojima ribor je puno patil. Na Brusnik te tuce svaki vitar. Kal je bilo jugo, kal su bile furtune, ako su dvi orti bile unijene, onda biste porinuli somo jedon brud i isli biste pripostovat na sest vesol. Ako su sinjoli bili na Kavalinu, obligalo bi vos po jugu puć pul Kavaline na sest vesol. Pok do Kavaline sekat. I kal ste dusli na Kavalinu i kal ste se ćapali sinjolih tu vej ni bilo pustit sinjole, nego sve dokle more agvantat brud i judi sve se je dvizolo. A kal se vej niste mogli agvantat, mola se niz vitar pul Brusnika i dujdi u Zolo pok se navuci. Digod bi se pul vonka, pul Kavaline jidrilo jugon. Bilo bi se po dvi ure do nje burdizalo na ruku tarcaluna, a ukarcalo bi se udij po pet-sest kvintolih stinjok usri broda, neka je brud jok. Pok bi se na ruku tarcaluna i na dvi sesule za sekat more portili pul vonka za duć do sinjolih.

Tu nisu bili judi obicni, tu su bili judi izabroni. Ti su judi imali pulse kako vesla. Ako ni bil jok ni mogal bit na skoju. A konkurencija je bila veliko. I ako nisi muskardin, ako nisi zdrov, jok, nisi ni mogal puć na more. Ni te nikur til vazest. Bili bi judi vozili albanko, bili bi se upiroli u bonke kal su navezali. Pok olma prova soto. Po pet-sest barilih bi kulap digod ulil, pok bi se sekalo, pok opet agvanta.

Veliko je bila borba za ujot jastoge. Tu je za ne virovot. Pok mokar, pok svi ol soli, pok na Brusnik bez vode. Na Brusnik se je gledolo gucoj vode kako u pustinju.

Autor: Joško Božanić

‍